MONU FARAR HAÇA-HAÇI
.jpg)
Ajjatú añcto bosór age, e dingwá hazár bosór tákí ayeddé Arakanor bácínda Rohingya okkóllól laí hono mamuli din no accíl. Bosór ór baade bosór Burmar Zalem Hokúmotor naforód, kanuni forok aardé insaaniyótír hélaf zulumor cíkar boni ayeddé, hótbontí hárai féláyédé Ruwáingár twarikh ót 2017 August Mac or 25 tarik ekgwá hótórnak hissá. Je timót manúcor sukót moribár kúab ardé dilot basi tákíbár dooñré andár accíl. Arakanor hál okkól ruwáingár kúnor joriya lal ói gélgói time. Hazár hazár behosúr Ruwáingá okkól nizor gór-bari hárai foríyar decót sahará luwa foijjé. Ogona ma-bóin okkól izzot hárai naf doritay jaan di mori giílgói. Arakanor háil zobin Lal oinor dúwáñyé andár bóní giílgói.
Aiyyó ajja añrá fíri saāi Busidong harir Monu farar ekkán hoilla-báñgá twarikh or ozu.
August Macor 25 tarik raitot, Phaung Daw Pying yató punduprang hoódé jaga yánot ot asédé gáñtí hamálá óiyedé yánór joriya, É din binná, farailla okkólé nizor arde górwálír hefájótolla Maung Nu fara, Fatiya fara, Zadi farang, hánza fara arde hañsá-haiñccá fara okkolot mazé sahára loil. Gudam górdé yánolla hamálár tábá hom aibó aar farar goinnó manúc Bodru aar tar bhái Zahed Hussain or górót Zalem military'r rehmi nozor tákíbó yán bafí, becír bág manúc Sahara hisaippá Monu farar é dui bái or góróré basí lóil. 200 yátó aro becí manúc Bodru aar tar bhái Zahed Hussain or górót sahará loil bolí janaja.
27 tarík August 2017, beil bátór woktó, binná 11 wá bazé, Palhay Taung yató mokbilot asédé Military okkólor 564 numbóror gáñtíttú 24 jón hañsá-haiñccá Military Bodru ó górór compónot hazír óil. Zalem military okkólor hazír ót fái baade, É taimot Bodruró górót sahará loildé manúc okkólé lamar talar gasór dorzá okkólot mazé tala lagai, cíñçi bái ouré bandat uçí uittílgói, jeçé agé lotí boót manúc joma ói taikkíldé asé.
Bíçat aiccédé 564 nombóror gáñtíttú ekjon military górór bútoré asédé manúc okkóloré baár mikká neli aíbóllá dak majjíl. Haça-haçittú basi accédé farailla okkólor hotá mutafék military ítar Naam BaGyaw, jité lamba time fojjóntó 564 nombóror gáñtít military ísaippá asé.
Ekjon oddó nelí ayéddé yán no dekí, Military okkól guli marí dorza báñí gólí baade Lamar talat accídé beçiyán ardé fuwain-cúwaindoré baár míkká nelai félail. É taimot BaGyaw hodé 564 nombóror gáñtír military íté 10 bosóijjá Mohammed Tofail oré matat gulí marí cohid gorí félail. Haça-haçittú Jane basi accédé Hótizá Begom or hota mutafék Mohammed Tofail ór mogoz kulí sair-tura ói kún bací meçít forí giílgói. Yábaade, beçiyándottú accíldé mubáil fún, hanor hanfúl, golar siyol okkól Zalem military okkólé súlaí loifélail aarde jisimi bezzotí okkól gojjíl. 20 jon yáto 25 Jon mela fuwain jitara beggúnóttúwáré cúndor ardé súrótbón accíl, tararé nigiílgói. Jitare arr wafes honotté fírí nó ayé.
Ea time yanotmajé kessú manúc foran lói dái jaigói failléo becír bág manúc dáibar hono mouka noófá. Baki accíldé Rohingya'r morot fuwain aar beçayán okkóloré físsá hát báñdí biçát aní baade jórgorái dí ardé guli marí marífélail. Jeçé homsé-hom 82 jón yáto 150 or oure behosúr manúc okkól Zalemor guli aar dhár súrír tolé forí cohíd oigilgoi. 37 jon manúc jaane basí Bangladesh ot hizorót gorí dái ai giílgói. Mara haíl dé éçé beggúnór cóñçowár boc 7 bosór arde beggúnór doñrgwár boc 95 bosór. Jarár kúnor joriya Bodru ró biçá ekkán taza kúnor doriya boni giílgói. Cóhid oígiílgói dé ítarar hono lac baade jayóré tuwai fanoózá. Farailla okkólor hotá mutafék Military okkólé lác okkól garít gorít gorí nigiílgói boli janaja. Lekín hoçé nigiyé yanór hono sobút ardé hobór faa noójá.
Cóhid oígiílgói dé éçé accíl :
Pondu prang Juma mosidor imamsáf Mv Mohammed Enous, UNHCR or Staff Mactor Mohammed Zaber, Maltiser or Staff Dil Muhammad, Hasan, Mactor Harun, Bodi Alam, Mistri Lal Mohammed, Mohammed Harun, Mohammed Foyas, Mactor Muji Ullah, Zahed Ullah , Salamt , Zahed Hossain ar íbar dui fuwa, Mv Nojimullah, Jani Alom, Jahangir, Hakim Ali, Naim éndíllá aro 100 háñsá-háñsí yáto aro becí behosúr Rohingya okkól.
25 August ór hát dórí ói accédé Monu farar haça-haçi ibat Rohingya okkólor becá becí jaani, maali, demaagi aar ma-bóin okkólor izzotor luksán oyyé. Becá-becí gór okkól zoli sái bóní giyégói. Pondu prangor Bor-Modorósá, bor-masjidór dhóillá deri fojjóntó twarikh ór hissá boní aiccédé kaayemi ciz okkóloré dóncó goríféláil. Dónco goríféláil hazár bosóror rosimi, rewaji sóbút okkól. Je zagár meçi okkól Rohingya okkólor hissá bonigiílgói, é zagat ajjá Rohingya'r hono hótbontí fojjóntó dehá noózá.
Jaan, maal, có-combóttí, izzot, gór, zomin, sóbút hárái foríyar kulot bocótí goreddé Rohingya okkólor noya nosól okkólottú furana twarikh okkólor sabbá okkól ulçai soón joruri. Janon joruri baf-dadar hazár bosóror cáhi twarikh okkól aar ehsas goron joruri báiñ foijjédé Rohingya koumor andájjá twarikh okkól.
Becók tuañttú tuañr koumor zimmadari asé!