RUÁINGGÁ ZUBAAN:
ACÁ ARDÉ ETTEFAKIR SÚR
— Anis Mostafa
“Gas zonombór raké monot tar cíyoñrór tan
Báñga dínot mui zurilám ruwáng bulir gaan.”
Koum nizor sinno ttú duré añzí zár goí dé waqto. Koumor koumiyoti zoñré hái nac oízárgóidé mockilla taim. Nosól basai raká árdé nizor koumor koumiyoti zinda rakíbár beggúnottú wáró takotbon ekkán háñtíyár óildé Nizor Maaduri Zubaan. Zubaan baná taallukat goríbar dormian noó, zubaane tikai raké uggwá koumor rosóm, sinno ardé ettefakiré. Lékín bosóror baade bosór, nizor zubaan oré añrá bekodori gorí ayír. Zubaanor torki ardé zubaani sóyi gorát honó díyán diya nōzá. Koumor rosómí buniyaadi ciz okkólor ekkán haás hissá zendila Tarana, Geet, Qawali, Gaana, Futi, Oóñlá, Burábúrír boson ardé aam-maincór ceér okkól sóñlí rakát behót komzur zimmadari deháiyí. Baná komzur zimmadari deháiyí dé noó bólké honotté iín hodún kimoti ciz boli hoi noó taáñrí. Fúwañtí fúwañtí gair zubaan okkóloré nizor zubaanottúwáré beñc tawajju diya zendila aám ectemá, enami cóba okkólót bormá zubaanot agenda huwá, ingerazi ardé bormá zubaanot boyan goraré becí caándar táñrá noya nosólór koumiyoti taakotoré borbaad gorí félár. Eckul, modrasa ardé darsháná okkólót Ruáinggá zubaanoré hámaká gorón joruri. Koumor awas nojowan cáér ardé lékóya okkólottú Ruáinggá zubaanot leká-lekít aró díyán doón joruri. Ceér, twarik, torjoma, kissá ardé hádef article okkól Ruáinggá zubaanot lekí koumor zubaani leká fórát torki ardé tuangori aná juwan lékóya okkólor koumi zimma. Official has-harbar okkól zendila ekrarnama yání statement okkólót ingerazi ardé bormá lekár fúwañtí fúwañtí Ruáinggá lekár estemaal barón joruri.
Ayyó añrá nizor haás sinno Ruáinggá zubaanoré sóñlí rákí. Noya nosólór bútoré fúçai tulí koumiyotir fúl. Zubaani ei inkilab ottún uçí ayyók uggwá cúndor koumiyoti nosól. Basi tákók Ruáinggá zubaan, basi tákók Ruáinggá koum!
"Gañtí raikkí ceérór sóra monor baganot
Ruwaingá zuban añár borai, adoijja maar amanot!"